LIPANDA

Lelo, mokolo ya ntuku misato

Na sanza ya motoba 

Ya mbula nkoto mibale na zomi na minei,

Bipayi bionso, bana ya Congo basangani

Pona kokanisa mobundi monene - Patrice Lumumba

Mpe baye babundaki elongo na ye

Po ete tozua lipanda

Uta tozua Lipanda, 

Totangi lelo ba mbula ntuku motoba na minei

Kasi mabele ya ba tata

Etikali na bowumbu, solo penza;

Sima na ba mbula oyo nionso,

Mwana ya Congo akoki kokoma ata Lingala te, solo;

Ata ko likanisi ezalaki kokangola mabele na bokonzi ya mopaya,

Bisaleli ya bapaya ekonzi mboka kino lelo,

Emononeli ya ba koko ekomi kolimua

Mwana muasi ya Congo azali koyemba Lipanda

Kasi elateli na ye etalisi ete azali mowumbu ya mopaya kino lelo;

Amilatisi ba suki lokola masala ya soso

Pona kokokana na poso pembe,

Kotambolaka na nzela nzoto bolumbu

Pe kolandaka lolenge ya baye bakonzaka 

Ata ko ba tata bapesaka bomoi pona kokabola biso na esaleli ya mopaya,

Bilenge mibali na Congo 

Bazali ko landa mboka ya malili,

Mpasi ya mboka elobeli bango eloko te

Ba koko baboyaka lolenge ya mopaya

Emononeli na bango ezalaka kobunda mpona kobatela bizaleli ya ba tata na bango -

Mwana ya Congo asosoli te ete esengeli to sangana elongo pona kokoba mosala oyo ba koko batikaki na nzela;

Ata ko ba bundaki etumba makasi,

Mboka etikali na bowumbu 

Po ete mwana ya Congo asosoli nanu te ete

Esengeli tobatela emononeli ya ba tata

Mpe tobunda pona mboka ekende liboso.